Lea-Artibai eta Mutriku

Autoak aparkatzeko ez ezik, egun berezietan plaza modura erabili ahalko dela adierazi du Jose Aspiazu alkateak.

Udaletxearen atzekaldean egiten ari diren aparkalekua sanjuanetarako erabiltzeko prest egongo dela aurreratu du Ziortza Bolibarko Udalak. Autoak aparkatzeko ez ezik, egun berezietan plaza modura erabili ahalko dela adierazi du Jose Aspiazu alkateak.
Asko pasa da Udalak aparkaleku berri bat egin nahi zuela esan zuenetik hona. Baina lanak hasita egon arren, zenbait oztopo topatu zituztela eta, aparkaleku berria uste baino beranduago bukatuko zutela ohartu ziren Udalekoak.
Izatez, aparkalekua udaletxearen atzekaldean joango da. Baina horretarako, lehendabizi, gunea zabaldu egin behar zuten eta horrek, mendiari zati bat kentzea suposatzen zuen. Lanak, neguan hasi zituzten, eta orain artean, indusmakinak lurra ateratzen ibili dira.
Eguraldi txarra
«Eguraldi txarra egin duenean, ezin izan dute lanik egin, lurra bustita dagoenean arriskutsua delako; dena mugitzen da», azaldu du Aspiazuk. Orain, ostera, eguzkiak laino artean bere bidea aurkitu duenean, berriro hasi dira indusmakinak lanean, lurra atera eta apar- kalekuari itxura emateko.
Gauzak horrela, San Juan Egunerako aparkalekua bukatuta egongo dela aurreratu du alkateak. «Nik ,uste, egun horretarako bukatuta egongo dela aparkalekua; dena ongi badoa, behinik behin».
Aparkalekua bukatuta dagoenean, guztira, 50 bat ibilgailurentzako lekua egongo dela aurreratu du Udalak. «Gutxi gora behera, 50 bat ibilgailu sartuko dira aparkalekuan; maketan ere horrela adierazi genuen».
Funtzio bikoitzeko aparkalekua
Aldiz, aparkalekuak, ez du beti funtzio bera beteko. «Egun berezietan, plaza bezala erabiliko dugu, eta horrela, leku gehiago lortuko dugu herrian. Eguraldi ona egiten duenean, kanpoko hainbat ekintza egin ahal izango ditugu aparkalekuaren zabalunea erabiliz. Horrela, elizaren aurrean dagoen parkea libreago geratuko da».
Izan ere, funtsean, aparkalekuak eliza aurreko plazan egoten diren autoei lekua egitea du helburu, baina Aspiazuk esan bezala, herrian jai egun bereziren bat ospatzen denean, aparkalekuko autoak kendu, eta zabalune berria erabiliko da. «Herrian lekua egin nahi dugu; gune berriak zabaldu», azpimarratu dute.
Horrela beraz, sanjuanetatik aurrera, Ziortza-Bolibarrek aparkaleku berria izango du; eta egun berezietan, hainbat ekintza berezi egiteko, ibilgailuak lekutik atera eta zabalune berrian bilakatuko da aparkalekua.